Euskalbar

Euskalbar 100.000 aldiz deskargatu da Mozillaren hedapenen webgunetik

admin — Thu, 05 May 2011 15:18:53 +0000

Hiru urte eta erdi igaro dira Euskalbar Mozillak hedapenetarako duen webgunean (addons.mozilla.org edo AMO) sartu genuenetik. Lehenago Euskalbar Internet&Euskadi elkartearen webgunean egon zen denbora luzez, eta 1.x eta 2.x serietako bertsioak bertan daude oraindik.

2007ko urriaren 5ean Euskalbar 3.0 jarri genuen AMOn, eta ordutik eduki dituen deskargak 100.000 izatera iritsi dira. Une egokia, beraz, Euskalbarren estatistikei begiradatxo bat botatzeko.

(Sakatu irudietan handiago ikusteko)

Kontuan izan estatistika hauetan ez direla kontuan hartzen bertsio berritzeak; beraz, bertsio batetik hurrengora eguneratzean gertatzen diren deskargak ez dira zenbatzen.

Goiko irudian eta hurrengoetan kontuan hartu beharreko beste faktore garrantzitsu bat oporraldiak dira: opor garaietan asko jaisten da deskargen kopurua, eta oporrek eragina dute geroago ikusiko ditugun beste berezitasun batzuetan.

Euskalbar batez beste 70-80 aldiz deskargatzen da egunero. Bestalde, eguneko erabiltzaile aktiboen kopurua 10.000 inguruan dago. Honek esan nahi du Euskalbar instalatuta daukaten 10.000 Firefox konektatzen direla sarera egunero. Adi, ez du esan nahi 10.000 ordenagailu horietako erabiltzaileak Euskalbar erabiltzen dutenik, instalatuta daukatela baizik. Kontuan hartu, baita ere, jende askok ordenagailu bat baino gehiago eduki dezakeela (bat etxean, bestea lantokian, etab.).

Datu espezifikoagoetara joz, goiko irudiak erakusten du une honetan Euskalbarren zein bertsio ari den erabiltzen 10.000 horietako bakoitza. Datuak asteetan pilatuta daude. Ikusten denez, duela hilabete argitaratu genuen Euskalbar 3.9 oraindik ez da nagusitu erabiltzaileen artean. Normalean bertsio berria dagoenean ordezkapena oso azkarra izaten da, eta astebete inguruan erabiltzaile gehienak bertsio berria ari dira erabiltzen. Oraingo honetan aldaketa motelagoa izango da, Euskalbar berria erabiltzeko Firefox 4.0 edukitzea derrigorrezkoa delako, eta Firefox berriaren eguneraketa ez denez automatikoa, jendeak denbora gehiago beharko du azken puntako Firefox eta Euskalbar erabiltzen hasteko.

Goiko irudian Euskalbar erabiltzaileek Firefoxen modu lehenetsian ezarrita daukaten locale-ak (ulertzeko, nabigazio-hizkuntza) ikus daitezke. Arruntenak soilik ageri dira irudian, guztira 50 locale ingurutan nabigatzen duten pertsonek daukate Euskalbar instalatuta.

Ikusten denez, gaztelania (es-ES locale-a) eta euskara (eu eta eu-ES locale-ak) nahiko parekatuta ageri dira. Bi berezitasun: alde batetik, oporraldietan euskaraz nabigatzen duten Firefoxak jaitsi egiten direla gaztelaniakoekin alderatuta, seguru asko eskoletako oporraldien eraginez; eta bestetik, Euskalbarren bertsio berriarekin, duela hilabetetik hona, handitu egin dela euskaraz nabigatzen duten lagunen kopurua.

Azkenik, irudi honek erakusten du nola banatzen diren Euskalbar erabiltzaileak sistema eragilearen funtzioan. Oro har, Euskalbar erabiltzaileen %90ak Windows darabil, %5ak Linux, eta beste %5ak Mac (irudian Darwin izenarekin identifikatuta dagoena). Bitxikeria gisa, kasu honetan ere desberdintasunak daude oporraldien arabera: eskola-sasoietan Linux erabiltzaileen ehunekoa igo egiten da beste biekin alderatuta. Honen arrazoia izan daiteke eskola batzuetan GNU/Linux sistemaren aldaeraren bat erabiltzen ari direla.

Euskalbar 3.9: Firefox 4 bertsiorako egokitua eta itxura berriarekin

admin — Fri, 18 Mar 2011 20:17:33 +0000

Firefox 4 labetik irteteko zorian dago, eta Euskalbar garatzen dugunok ere lanean aritu gara euskarazko hiztegi eta baliabideak kontsultatzeko sortu dugun aplikazio txiki
hau egokitzeko eta haren aurpegia garbitzeko.

Oraingoan gure helburua Euskalbar Firefox berrira egokitzea izan denez, erabiltzaileok ez duzue funtzionaltasun berri askorik aurkituko. Bertsio honetarako lana batez ere Euskalbarren barruan dagoen kodea txukuntzera bideratu da. Aldaketa kosmetikoak ere egin dira, itxura berria emanez bai aplikazioari bai webguneari.

Erabiltzaileak sumatuko duen aldaketa nabarmenena barraren ezkerreko aldean zeuden menuen desagertzea da. Aldaketa honekin espazio apur bat irabazi da barran hiztegien botoi gehiago erakusteko. Aipatutako aukera horietara sartzeko orain nabigazio-barrarako sortu den botoi batetik egin beharko da. Modu lehenetsian botoi hori eskuinean kokatu da, bilaketa-motorrak dauden kutxaren (“Google-en kutxaren”) eskuinean. Hala ere, botoia lekuz alda daiteke, eta barraren beste edozein tokitan kokatu.

Itxurari dagokionez, Euskalbarrentzako ikono berria sortu da, Elementary ikono-multzoan eta Zaldieroa letra-tipoan oinarrituta. Ikono berritik abiatuta, webgune osoa eraberritu da. Azal lehenetsi berria sortu da bilaketa konbinatuetarako, Euskalbarren webgunearen itxura berriarekin bat datorrena. Bestalde, azal pertsonalizatuak sortzeko aukera kendu da hobespenetatik, ez baitzen oso erabilgarria erabiltzaile arrunt baten ikuspuntutik.

Beste zenbait aldaketa eta konponketa txiki ere egin dira. Aldaketa guztiak aldaketen egunkarian kontsulta daitezke.

Euskalbarren bertsio berri hau Firefox 4 bertsiotik gora dutenek soilik erabili ahal izango dute. Firefox 3 eta aurrekoak dituztenek Euskalbarren bertsio zaharrarekin geratuko dira.

Bertsio honen berritasunak bideo txiki batean laburbildu ditugu. On egin!

Euskalbar 3.8: bost hiztegi berri eta botoi guztiak ezkutatzeko aukera

admin — Wed, 29 Sep 2010 20:49:41 +0000

Bertsio berri honetan hiztegi gehiago gehitu dizkiogu Euskalbarri. Hain zuzen, bost gehiago dira oraindik aurrera kontsultatu ahalko diren hiztegiak:

Lehen hirurak, botoien bidez edo Enter sakatuz kontsultatzeaz gain, bilaketa konbinatuetan ere erabili ahal izango dira.

Bestalde, barran dugun botoi-kopurua gero eta handiagoa dela ikusita, edozein botoi, baita hizkuntzei lotutakoak ere, ezkutatzeko aukera ematea erabaki dugu. Beraz, botoi guztiak ezkutatu edo erakutsi ahal izango dira bertsio berrian.

Azkenik, azal berria gehitu dugu bilaketa konbinatuetarako: grisleun. Eskerrik asko Gotzon Egia.

On egin.