Euskalbar » Hiztegi eta baliabideak

Euskalbar 3.7 bertsioak Zehazki hiztegia dakar

admin — Tue, 04 May 2010 18:22:09 +0000

Euskalbarren bertsio berri honetan Zehazki hiztegia kontsulta daiteke barran kokatutako botoi baten bidez. Horrez gain, aldaketatxo bat egin dugu testu-kutxan eta orain haren tamaina aldagarria da: kutxaren eskuineko aldea eskuinera edo ezkerra mugituz, txikitu edo handitu egin daiteke, eta horrela barran botoi gehiago edo gutxiago erakuts daitezke.

Bestalde, lehendik zeuden hurrengo akatsak konpondu dira:

Euskalbar 3.5 eta 3.6: bi eguneraketa batera

admin — Sat, 31 Oct 2009 05:05:56 +0000

2009ko ekainean Gmane posta-zerrenden biltegiko arduradunengandik jasotako eskari baten ondorioz, aurrerantzean ItzuL posta-zerrenda Gmanen ez kontsultatzea erabaki dugu. Irtenbide gisa, ItzuLen kontsulta Google Search bidez egiten du orain Euskalbarrek. Aldaketa hau egingo genuela baliatuta, beste hobekuntza batzuk sartu genituen bertsio berrian. Erabiltzaileentzako nabarmenena Labayru hiztegiaren kontsulta gehitu izana da. Orain bizkaiera eta batua uztartzen dituen hiztegi hau kontsultatu ahal da bai modu sinplean bai bilaketa konbinatuetan.

Bertsio honetarako egindako beste zenbait aldaketa teknikoagoen ondorioz, Euskalbar ezin izango da instalatu Firefoxen bertsio zaharrenetan. Euskalbar instalatu nahi duenak edo bertsio berri honetara eguneratu nahi duenak ezinbestez eduki beharko du duela urte t’erdi argitaratutako Firefox 3.0 bertsioa edo berriagoa.

Euskalbarren bertsio hau, 3.5 deitu genuena, Mozillaren hedapenen webgunean (AMO) argitara zezaten itxaroten ari ginela, Euskaltzaindiak Orotariko Euskal Hiztegia sareratu zuen duela bi aste. Baliabide hau Euskalbarren integratzea garrantzitsua zela erabaki genuen eta berehala prestatu genuen Euskalbarren eguneraketa azkarra, 3.6 bertsioa, eta AMOra bidali genuen. Azkenean, gaur argitaratu dute, eta laster Euskalbar instalatuta daukaten ordenagailuek gehigarria eguneratzeko oharra jasoko dute.

Bi bertsio hauetarako egindako aldaketa guztien zerrenda hemen dago.

Euskalbarren bertsio berriena instalatu nahi izanez gero, sakatu hemen.

Euskalbar 3.4 euskara-japoniera hiztegiarekin dator

admin — Wed, 18 Mar 2009 17:06:13 +0000

Euskalbarren bertsio berri honek Goihata enpresak egindako eskakizun zehatz bati erantzun dio. Goihataren laguntzarekin garatuta, argitaratu berri den Euskalbar 3.4 bertsioak euskara-japoniera hiztegian kontsultak egitea ahalbidetzen du. Horrez gain, japonierako lokalizazioa erantsi zaio Euskalbarri.

Euskalbar moldatuko genuela baliatuta, beste aldaketatxo bat sartu dugu: orain Ereduzko Prosa Gaur webguneko kontsultak beste metodo bat erabiliz egiten dira, baliabide honen arduradunen iradokizunari jarraituz. Aldaketa honek ez du eraginik Ereduzko Prosa Gaur webgunetik jasotzen den informazioan.

Euskalbarren 3.2 bertsioak frantsesa, ingelesa eta latina dakartza

admin — Wed, 16 Jul 2008 22:00:39 +0000

Elhuyarrek bere hizkuntza-zerbitzuak on line jarriko zituela baliatuz, Euskalbarren bertsio berria prestatu eta kaleratu dugu.

Euskalbar 3.2 bertsioaren berrikuntza nagusia frantsesezko hiztegiak kontsultatzeko aukera da. Orain Euskalterm-ek eskaintzen duen frantsesezko terminologia eta Elhuyarrek sarean jarri duen euskara-frantsesa-euskara hiztegia erabil daitezke. Horrez gain, frantsesezko lokalizazioa erantsi zaio Euskalbarri, Firefox frantsesez duen edonork Euskalbarren interfazea ere hizkuntza berean erabili ahal izan dezan.

Bestalde, Elhuyarren ingelesa-euskara-ingelesa hiztegian kontsultak egiteko aukera berria ere sortu da. Garapen hau Euskalbarren aurreko bertsioan ingelesezko hiztegietan egin zitezkeen kontsultak osatzera dator.

Euskalbar berriak Euskalterm-eko latinezko terminologia ere erabil dezake. Erabiltzaile batek Google Code-ren webgunean egindako iradokizun bati erantzun dio garapen honek.

Amaitzeko, hemendik aurrera Elhuyarren gaztelania-euskara-gaztelania hiztegia Elhuyarren webgune berritik atzituko da.

Euskalbar 3.2 denon gustukoa izatea espero dugu. Zuzenean instalatu nahi izanez gero, sakatu hemen. Inork iradokizunen bat badauka, ez ahaztu hemen utz dezakeela.

Hiztegi eta baliabide gehiago Euskalbarren: Ereduzko Prosa Gaur, Klasikoen Gordailua, Elebila eta Wikipedia

admin — Sun, 25 Nov 2007 21:07:56 +0000

Euskalbar euskararen alorreko baliabidez hornitzen jarraitzen dugu. Erabiltzaileen iradokizunei kasu eginez, hurrengo bertsioarekin beste lau webgunetan egin ahal izango dira kontsultak:

Euskalbarren ohi den bezala, webgune hauetan kontsulta egiteko modu orokorra gaitu da. Badauzkagu kontsulta espezifikoagoak integratzeko asmoa, Euskalterm-ekin egin genuen bezala, baina oraindik ez dugu erabaki zein den aukera hori garatzeko biderik egokiena.